मन्त्रालयगत विनियोजनमाथि प्रश्न उठाएर कांग्रेसले माग्यो बजेटमा पुनर्लेखन, बोलायो संसदीय दल

५ असार, काठमाडौं । आगामी आर्थिक वर्षको बजेट पारित हुने अघिल्लो दिन आएर नेपाली कांग्रेसले बजेटमाथि पुनर्लेखन हुनुपर्ने माग राखेको छ । मन्त्रीहरूले बजेटमा आफूखुसी गरेको भन्दै कांग्रेसले पुनर्लेखन गर्न माग गरेको हो । प्रधानमन्त्री पुष्पकमल दाहाल प्रचण्डलाई बजेटमा हस्तक्षेप गरी पुनर्लेखन गर्न आग्रह गरेको छ । 

शक्ति र सत्ताको दुरुपयोग गरी मन्त्रीहरूले आफ्नै क्षेत्रमा अधिकांश बजेट लगेको कांग्रेसको ठहर छ । कांग्रेसले मन्त्रालयको बजेट पुनःलेखन गर्नुपर्ने नत्र पारित गर्न नहुने दावी गरेको छ । बुधवार संसद भवन परिसरमा सञ्चारकर्मीहरुसँग कुरा गर्दै कांग्रेस प्रमुख सचेतक रमेश लेखकले मन्त्रालयको बजेट संशोधन गर्नुपर्ने पक्षमा कांग्रेस रहेको बताए । 

उनले मन्त्रीहरूले आफ्नो आफ्नो मन्त्रालयमा प्राप्त बजेटको अधिकांश हिस्सा आफ्नै क्षेत्रमा लैजाने, आफ्नै जिल्लामा लैजाने कुराले ज्यादा अपरिपक्व, गैरजिम्मेवार र दुरुपयोग गरेको पुष्टि भएको भन्दै बजेट पुनर्लेखन हुनेपर्ने बताए । लेखकले यो शक्ति र सत्ताको दुरुपयोग गरी मन्त्रबीहरुले बजेटमा अत्याचार गरेको दावी गरे । बजेट कसले पायो र पाएन भन्ने भन्दा पनि बजेटको मुल मान्यतामाथि नै त्रुटी भएको दावी गरे । 

मन्त्रीजीहरूले आफ्नो आफ्नो मन्त्रालयमा प्राप्त बजेटको अधिकांश हिस्सा आफ्नै क्षेत्रमा लैजाने, आफ्नै जिल्लामा लैजाने कुराले ज्यादा अपरिपक्व, गैरजिम्मेवार र अत्यन्त ज्यादा दुरुपयोग भयो । यो शक्तिको पनि दुरुपयोग हो, सत्ताको पनि दुरुपयोग हो, उनले भने । लेखकले प्रधानमन्त्रीले मन्त्रीहरूलाई बोलाएर बजेट पुनर्लेखन गर्न लगाउनुपर्ने र अन्यथा प्रधानमन्त्री नै बेठीक ढंगको बजेट विनियोजनमा संलग्न रहेको बुझिने बताए । 

यस विषयमा छलफल गर्न कांग्रेसले संसदीय दलको बैठक पनि बोलाएको छ । कांग्रेसले शुक्रबार संघीय संसद भवन नयाँ बानेश्वरस्थित ल्होत्से हलमा अपरान्ह ३ बजेका लागि संसदीय दलको बैठक बोलाएको हो । त्यस अघि २ बजे संसदीय दल कार्यससमितिको बैठक बस्ने भएको छ । सरकारले संसदबाट बजेट पारित गर्ने तयारी गरेका कारण सो विषयमा छलफल गर्न संसदीय दलको बैठक बोलाएको बताइएको हो ।