सर्वोच्चको आदेश विपरित प्रदेश सभाको ढोकामै रोकिए गण्डकीका सांसद देवकोटा

१३ असार, काठमाडौं । गण्डकी प्रदेशका सांसद फणीन्द्र देवकोटालाई प्रदेश सभा प्रवेशमा रोक लगाइएको छ । बिहीबार प्रदेशसभा पुगेका उनलाई मर्यादापालकले बाहिरै रोकेका छन् । सभामुखले मर्यादापालकलाई दोककोटालाई नरोक्नु भन्ने आदेश नदिएका कारण उनी रोकिएका हुन् । 

बैठकमा सहभागी हुन आएका देवकोटालाई मर्यादापालकले भित्र प्रवेश गर्न नदिएपछि उनी बाहिर बसिरहेका छन् । ह्वीप उल्लंघन गरेको भन्दै माओवादी केन्द्रले देवकोटालाई सांसद पदबाट हटाएपछि देवकोटा सर्वोच्च अदालतमा रिट दायर गरेका थिए । उनको रिट उपर सर्वोच्चले सोमबार गण्डकी प्रदेश सभा सदस्यका रूपमा काम गर्न दिन अन्तरिम आदेश दिएको थियो ।
 
त्यो आदेशबारे सभामुखले सभामा जानकारी गराएका छैनन् । नेकपा माओवादी केन्द्रको कारबाहीमा परेका देवकोटालाई कारबाही गर्न नमिल्ने भन्दै सर्वोच्च अदालतले सोमबार अन्तरिम आदेश जारी गरेको थियो । माओवादीले गत जेठ ३१ गते पत्रबाट गरेको कारबाही पत्र सुनाउँदै सभामुख कृष्ण प्रसाद धितालले निलम्बनको सूचना पढेर सुनाएका थिए । त्यसपछि उनी सभामा गएका थिएनन् । 

देवकोटालाई माओवादी संसदीय दलका नेताले २०८१ जेठ २९ गते स्पष्टीकरण सोधेको र ३१ गतेको पत्रबाट कारबाही गरिएको थियो । गएको निर्वाचनमा नेपाली कांग्रेस, नेकपा माओवादी केन्द्रसहितको गठबन्धनबाट देवकोटाले चुनावमा भाग लिएका थिए । उनले माओवादीको चुनाव चिन्हबाट चुनाव जितेका थिए ।