सभापति देउवाले नाम मागेपछि कोइराला समूहमा मन्त्री पठाउने बारे छलफल, ४ जना दावी गर्ने निर्णय

३० असार, काठमाडौं ।  नेपाली कांग्रेसका वरिष्ठ नेता डा. शेखर कोइरालाले नेकपा एमालेका अध्यक्ष केपी शर्मा ओलीको नेतृत्वमा बन्ने नयाँ सरकारमा पठाउने मन्त्रीहरूका विषयमा आफ्नो समूहका नेताहरूसँग छलफल गरेका छन् । ओलीलाई आज प्रधानमन्त्रीमा नियुक्त गरेर भोलि शपथ गराउने तयारी छ । 

आज साँझसम्ममा सरकारमा जाने मन्त्रीहरूको टुंगो लगाइसक्नु पर्ने भएकाले कोइरालाले आइतबार बिहान आफ्नो सचिवालय विशालनगरमा नेताहरूलाई बोलाएर छलफल गरेका हुन् । कोइरालाले आफ्नो समूहबाट मन्त्रीको नाम पठाउनुपर्नेछ । सभापति शेरबहादुर देउवाले मिलाएर तीन जनाको नाम पठाउन भनेका छन् । तर, बैठकले चार जना दावी गर्ने निर्णय गरेको छ ।

ओली नेतृत्वको सरकारमा कांग्रेसले पाउने मन्त्रालयको संख्या पनि घट्ने देखिन्छ । साना दललाई पनि सरकारमा सामेल गराउनुपर्ने भएकाले कांग्रेसले ९ मन्त्रालय मात्र पाउने देखिएको छ । कोइरालालाई समूहबाट ४ मन्त्रालय दिनुपर्ने माग राखेर सभापतिलाई दवाव दिन नेताले सुझाएका छन् । समूहबाट सरकारमा मन्त्री पठाउने विषयको छलफलमा समूहका प्राय नेताहरु उपस्थित थिए । 

 

बैठकमा सहभागी नेता अर्जुननरसिंह केसीका अनुसार समूहले चार मन्त्री माग गर्ने र समूहबाट पठाउने मन्त्रीको चयन गर्ने अधिकार शेखर कोइराला, गगन थापा र धनराज गुरुङलाई दिइएको छ ।

कोइरालाको सचिवालय विशालनगरमा भएको छलफलमा उपसभापति धनराज गुरुङ,महामन्त्री गगन थापा, सहमहामन्त्री जीवन परिवार, बद्री पाण्डे, अर्जुननरसिंह केसी, बलबहादुर केसी,दिलेन्द्र बडु, डा मीनेन्द्र रिजाल, डा चन्द्र भण्डारी लगायत सहभागी थिए । छलफलमा नेताहरूले आ–आफ्नो धारणा राखेका थिए । आज अबेरसम्ममा कोइरालालाई आफ्नो समूहबाट नाम पठाउने बताइएको छ ।