रौतहटमा ४ लाखबढी अवैध रकमसहित भारतीय नागरिक पक्राउ

१० साउन, रौतहट । रौतहटको सदरमुकाम गौर स्थित सशस्त्र प्रहरी सहित संयुक्त  टोलीले  ४ लाख भन्दा बढी अवैध रुपैया सहित एकजना भारतीय नागरिकलाई पक्राउ गरेको छ । गौर नगरपालिका २ भन्सार इलाकामा प्रस्तावित सीमा सुरक्षा गुल्म गौरका प्रमुख डीएसपी राजेश कुमार श्रेष्ठको कमान्डमा सशस्त्र बल नेपाल  र नेपाल प्रहरीको भन्सार सुरक्षा गार्डको संयुक्त टोलीले भारतबाट नेपाल तर्फ आउँदै गरेको विआर ३० एसी ७९१४ नम्बरको मोटरसाइकल चेक जाँच गर्दा मोटरसाइकलको भाईजर भित्र लुकाएको ४ लाख ४० हजार रुपैया बरामद भएको हो ।

मोटरसाइकल चालक भारत विहार जिल्ला सितामढी बैरगनिया -८ असोगी टोल बस्ने वर्ष ४७ को प्रदिप कुमार वर्मा लाई श्रोत नखुलेको नेपाली रुपैया चार लाख चालिस हजार र हिरो स्प्लेन्डर मोटर साइकल सहित नियन्त्रणमा लिएको सशस्त्र प्रहरी रौतहटका प्रमुख एसपी बिक्रम हुमागाईंले बताएका छन् । पक्राउ परेका वर्मालाई आवश्यक कारवाहीको लागि बरामद रुपैया र मोटरसाइकल सहित जिल्ला भन्सार कार्यालय गौरमा रौतहटमा बुझाइएको सशस्त्र प्रहरीले जनाएको छ ।