एमालेलाई जग्गादान प्रकरणः न्यायाधीश सुवेदीको इजलासमा रिटको सुनुवाइ

८ कात्तिक, काठमाडौं । नेकपा एमाले लिएको जग्गादानविरुद्ध परेको रिटको पेशी सर्वोच्च अदालतका न्यायाधीश नहकुल सुवेदीको इजलासमा परेको छ । एमालेको केन्द्रीय कार्यालय भवन बनाउन व्यवसायी मीनबहादुर गुरुङले दिएको जग्गादानविरुद्ध सर्वोच्च अदालतमा  बुधबार रिट निवेदन परेको थियो । 

यो रिटको सुनुवाइका लागि न्यायाधीश डा. नहकुल सुवेदीको इजलासमा पेसी तोकिएको छ । सर्वोच्चको सूचीअनुसार उक्त रिटको पेसी सुवेदीको इजलासको १२औं नम्बरमा परेको छ । 

गत असोज २५ गते काठमाडौँको कीर्तिपुर नगरपालिका–२, मैत्रीनगरमा रहेको १० रोपनी १४ आना जग्गा दान गरेको घोषणा गरेका थिए । विवादित व्यवसायीबाट यति ठूलो सम्पत्ति दान लिनु भ्रष्टाचार नै भएको दाबी गर्दै ज्ञानकुमार बस्नेतले सर्वोच्चमा रिट दायर गरेका थिए । 

हालको प्रचलित बजार मूल्यअनुसार दान गरेको जग्गाको मोल ७० करोड भएको बताइएको छ । गुरुङ ललिता निवास जग्गा घोटाला प्रकरणका मुख्य दोषी हुन् । विशेष अदालतले उनलाई २ वर्ष कैद सजाय सुनाएको छ । यस्ता विवादित व्यवसायीबाट जग्गादान लिएको विषयमा अहिले आलोचना भइरहेको छ ।