काठमाडौंमै अवतरण भयो थाई एयर एशियाको जहाज

११ कात्तिक, काठमाडौं । थाई एयर एशियाको जहाज त्रिभुवन अन्तर्राष्ट्रिय विमानस्थलमै अवतरण भएको छ । झण्डै एक घण्टा आकाशमा होल्ड गराइएको जहाजलाई अवतरणको अनुमति दिएपछि बसेको हो । 

नेपालमा उडान अनुमति म्याद सकिएको भन्दै २ बजे अवतरण हुनुपर्ने थाई एयर एसियाको जहाजलाई आकाशमा होल्ड गराइएको थियो । मानविय संवेदनालाई ख्याल गरेर काठमाडौंमै अवतरण गर्न अनुमति दिइएको विमानस्थल प्रशासनले जनाएको छ । 

दर्जन पटक काठमाडौंको आकासमा जहाजले फन्का मार्नुपर्दा यात्रहरु अतालिएका थिए । त्रिभुवन विमानस्थलका महाप्रबन्धक जगन्नाथ निरौलाले जहाजमा रहेका यात्रुको सुरक्षा र मानवीयताका आधारमा जहाजलाई काठमाडौंमा अवतरण अनुमति दिइएको जानकारी दिए । 

यात्रु लिएर नेपाल आएको थाई एयर एसियाको जहाजलाई दिउँसो २ बजेदेखि आकाशमा होल्ड गरिएको थियो । नेपालमा बस्ने अनुमति सकिएको भन्दै उसलाई ल्याण्ड गर्न नदिइएको हो । जहाजलाई उतै फर्कन भनिएको थियो । तर, फर्कदा दुर्घटना हुनसक्ने देखियो । जहाजलाई अवतरण गराउने वा डाइभर्ट गराउने भन्नेबारे प्राधिकरणका अधिकारीहरूबीच लामो छलफल चलेको थियो ।