प्रधानमन्त्रीलाई मार्नुपर्ने आशयको अभिव्यक्ति दिने कार्कीलाई पक्राउ गर्न ब्यूरोले थाल्यो प्रक्रिया

२१ कात्तिक, काठमाडौं । नेपाल प्रहरीको केन्द्रीय साइबर ब्यूरोले जापानमा बसेर सामाजिक सञ्जालमार्फत उच्छृंखल अभिव्यक्ति दिने भ्लगर रतन कार्कीविरुद्ध अनुसन्धान अघि बढाएको छ । उनले साफ महिला च्याम्पिनसिपको फाइनल खेलमा प्रधानमन्त्री केपी शर्मा ओलीलाई मार्नुपर्ने अभिव्यक्ति दिएका थिए । 

उनले युट्युब तथा सामाजिक सञ्जाल, टिकटक, फेसबुक, इन्सटाग्राम लगायतमा कार्कीले अराजकता फैलाएको ब्यूरोको ठहर छ । दशरथ रंगशालामा साफ वुमन्स च्याम्पिनसिपको फाइनल खेल भइरहेका बेला युट्युब लाइभमा उनले ‘प्रधानमन्त्रीलाई मार्नुपर्ने’ आशयको अभिव्यक्ति दिएका थिए । कार्की मात्र हैन, उनी जस्ता सामाजिक सञ्जालमा अभिव्यक्ति दिने जोकोहीलाई पनि इन्टरपोलमार्फत नेपाल ल्याएर कारबाही गर्ने तयारी ब्यूरोको छ । 

साइबर ब्युरोका एक अधिकारीले दिएको जानकारी अनुसार अनुसन्धान अघि बढाएपछि सामाजिक सञ्जालमा उक्त भिडिओ पोस्ट गर्ने कार्कीले माफी मागेका छन् । आफ्नो इन्टेन्सन त्यस्तो नभए पनि बोल्ने बेलामा जिब्रो चिप्लिएर मार्छु भन्ने शब्द प्रयोग भएको भन्दै उनले स्ष्टीकरण दिएका छन् । उक्त शब्द प्रति माफीसमेत माग्दै उक्त भिडिओसमेत आफूले हटाइसकेको भ्लगर कार्कीले उल्लेख गरेका छन् ।

चितवनका कार्की अहिले विद्यार्थी भिसामा जापानमा छन् । उनी जापानमै रहे पनि प्रहरीले उनीमाथि अनुसन्धान अघि बढाएर कारबाहीको प्रक्रिया थालेको छ । विदेशमा बसेरमा विद्युतीय माध्यममार्फत साइबर अपराध गर्नेविरुद्ध साइबर ब्यूरोले कारबाही गर्दै आएको छ । कार्की मात्रै होइन यसअघि र पछि यस्तो अराजक अभिव्यीक्त दिने व्यक्तिहरुलाई विदेशबाट नेपाल ल्याएर कारबाही गर्ने ब्यूरोले जनाएको छ । 

विदेशमा बसेर साइबर अपराध गरे पनि उनीविरुद्ध विद्युतीय कारोबार ऐन, २०६३ को कसुरमा साइबर मुद्दा दर्ता गरेर प्रहरीले यरीलाई नेपाल फिर्ता ल्याउने प्रक्रिया अघि बढाएको हो । प्रहरीको अन्तर्राष्ट्रिय संगठन इन्टरपोललाई पत्राचार गरेपछि यरी विरुद्ध रेड नोटिस पनि जारी भई व्यक्ति पक्राउ पर्ने र नेपाल ल्याइने ब्युरोले जनाएको छ ।