साढे ५ किलो सुन तस्करी गर्ने तीन आरोपी पुर्पक्षका लागि कारागार पठाइए, ८ करोड बिगो दावी

१८ मंसिर, काठमाडौं । सुन तस्करी प्रकरणका तीन जना आरोपी जेल चलान भएका छन् । त्रिभुवन अन्तर्राष्ट्रिय विमानस्थलबाट बरामद भएको ५ किलो ७ सय ग्राम सुन पक्राउ परेको घटनाका तीन जना आरोपीलाई पुर्पक्षका लागि कारागार पठाइएको हो । मंगलबार काठमाडौं जिल्ला अदालतका न्यायाधीश विष्णुप्रसाद उपाध्यायको इजलासले पक्राउ परेका एक चिनियाँ र दुई म्यानमारका नागरिकलाई कारागार चलान गर्न आदेश दिएको हो ।

उनीहरू २० कात्तिकमा दुबईको शाहजहाँबाट एयर अरेबियाको उडान नम्बर जी ९५३० मार्फत काठमाडौं आएका थिए । उनीहरूको लगेज जाँच गर्दा त्यसमा केही फलामजन्य वस्तु भेटिएको थियो । आफूले स्पिकर ल्याएको भनेपछि ती स्पिकर समेत खोलेर हेर्दा सुन ल्याएको भेटिएको थियो । उनीहरूले १२ वटा स्पिकरमा फल्स बटम बनाएर सुन ल्याएका थिए । 

यसपछि प्रहरी र भन्सारको टोलीले उनीहरूलाई नियन्त्रणमा लिएको थियो । १२ वटा स्पिकरमा फल्स बटम बनाएर रिङ आकारको सुन उनीहरूले ल्याएका थिए । अदालतको आदेशसँगै चिनियाँ नागरिक जियान योङ र म्यानमारका साट नेइङ टन र इङ ङोन फू कारागार चलान भएका हुन् । भन्सार कार्यालयले उनीहरू विरुद्ध सुन भन्सार चोरी पैठारीको कसुरमा ८ करोड भन्दा बढी बिगो माग दाबी गर्दै मुद्दा दायर गरेको थियो । १६ मंसिरमा दायर भएको मुद्दाको आज सुनुवाइ सकिएको हो ।