घिसिङलाई पत्तै नदिई उर्जामन्त्रीले विद्युत प्राधिकरणमा खोले कार्यकक्ष, अन्योलमा कर्मचारी

१९ मंसिर, काठमाडौं । बिद्युत बक्यौताका कारण नेपाल विद्युत प्राधिकरणका कार्यकारी निर्देशक कुलमान घिसिङ र सरकारबीच विवाद चलिरहेका बेला उर्जामन्त्री दीपक खड्काले रत्नपार्कमा रहेको विद्युत प्राधिकरणको भवनमा कार्यकक्ष खोलेका छन् ।

सो कार्यकक्षमा आज बुधबार उद्घाटन गरेर मन्त्री खड्काले नियमित बस्ने मनस्थिति बनाएका छन् ।  सबै प्राधिकरणका कर्मचारीलाई कार्यकक्ष उद्घाटनमा सहभागी हुन भनिए पनि कार्यकारी प्रमुख घिसिङलाई निम्ता दिइएको छैन् । उनले मन्त्रीले कार्यकक्ष खोलेको औपचारिक जानकारी पनि पाएका छैनन् ।  

मन्त्री खड्काले कार्यकक्ष खोलेपछि विद्युत प्राधिकरणका कर्मचारी पनि अचम्मित बनेका छन् । केही कर्मचारीले मन्त्री खड्काको कदमलाई स्वागत गरेका छन् भने केही कर्मचारीले विरोध जनाएका छन् । प्राधिकरण कर्मचारीका अनुसार कार्यकारी निर्देशक घिसिङको कार्यकक्षभन्दा माथिल्लो तलामा मन्त्रीको कार्यकक्ष बनाइएको छ । मंगलबार अबेरसम्म बसेर कार्यकक्षको सजावट गरिएको थियो ।  

कर्मचारीका अनुसार प्राधिकरणको अध्यक्षको हैसियत रहने मन्त्रीले प्राधिकरण कार्यालयमै कार्यकक्ष राख्ने अभ्यास यसअघि थिएन् । यसअघिका कुनै पनि अध्यक्षले प्राधिकरण कार्यालयमा कार्यकक्ष बनाएका थिएनन् । ऊर्जामन्त्री खड्काले प्राधिकरण नेतृत्वमाथि हस्तक्षेप गर्न प्राधिकरण कार्यालयमै कार्यकक्ष बनाएको कर्मचारीहरूको आरोप छ । दैनिक रूपमा केही समय प्राधिकरणको कार्यकक्षमा समय बिताउने योजना बनाएको बताइएको छ । यसबारे मन्त्री खड्काले भने कुनै प्रतिक्रिया दिएका छैनन् ।