वालिङ महोत्सवको नाफा जम्मा ३३ लाख ?

स्याङ्जा । गत बर्षको माघमा गरिएको सातौ वालिङ महोत्सवको आयव्याय सार्वजनिक भएको छ । करिब ६ महिनापछि गरिएको महोत्सवबाट ३३ लाख ९५ हजार १ सय ६९ रुपैया नाफा भएको आयव्यय विवरण पत्रकार सम्मेलन गरी सार्वजनिक गरिएको हो ।

महोत्सव सकिएको एक महिना भित्रमा आयव्यय सार्वजनिक गर्ने प्रतिबद्धता जनाएको वाणिज्य संघले बल्ल सार्वजनिक गर्ने मौका पाएको छ । आन्तरिक राजस्व कार्यालय, प्रायोजकहरुबाट पाउनु पर्ने रकममा ढिलाई र केही आयोजकले रकम फछ्र्यौटमा ढिलाई गरेका कारण आयव्यय विवरण सार्वजनिक गर्न ढिलाई हुन पुगेको पत्रकार सम्मेलनमा जानकारी दिइएको थियो ।

महोत्सव शुरु हुनुभन्दा अगावै आयोजकले २ करोड १० लाख आम्दानी र १ करोड ५० लाख ५१ हजार खर्च भई ६० लाख वचत गर्ने अनुमानित बजेटसहित लक्ष्य राखेको थियो । तर आयोजकले वचतमा अनुमानित गरे भन्दा ४५ प्रतिशत कम नाफा गर्न सफल भएको देखाएको छ ।

माघ १७ गते देखि २८ गते सम्म संचालन भएको सातौ महोत्सवमा १ करोड ७९ लाख ९५ हजार ८ सय ७ आम्दानी भएको छ भने १ करोड ४६ लाख ६ सय ३८ रकम खर्च भएको छ । जसबाट ३३ लाख ९५ लाख १ सय ६९ रुपैया वचत भएको पत्रकार सम्मेलनमा वालिङ उद्योग वाणिज्य संघका अध्यक्ष शोभाकान्त पौडेलले जानकारी दिए । महोत्सव शुरु हुनुभन्दा अगावै आयोजकले २ करोड १० लाख आम्दानी र १ करोड ५० लाख ५१ हजार खर्च भई ६० लाख वचत गर्ने अनुमानित बजेटसहित लक्ष्य राखेको थियो । तर आयोजकले वचतमा अनुमानित गरे भन्दा ४५ प्रतिशत कम नाफा गर्न सफल भएको देखाएको छ ।

महोत्सवमा भएको खर्चमा सबै भन्दा बढी खर्च कलाकार व्यवस्थापनमा भएको देखाएको छ । १५ लाख अनुमान गरेको आयोजकले झण्डै १० लाख भन्दा बढी कलाकार व्यवस्थापनमा खर्च भएको छ । त्यस्तै प्रचार प्रसारमा ६ लाख अनुमान गरेकोमा दुई तिहाई खर्च भएको देखाएको छ । अतिथि सत्कार, खाजानास्ता, आँधीखोलामा निर्माण गरिएको जलासय कृतिम ताल, लगायतका अधिकांश विषयमा आयोजकले अनुमान गरेको भन्दा बढी खर्च भएका कारण आयोजकले लक्ष्य अनुसारको रकम बचाउन नसकेको आयोजकले स्विकारेको छ । आयोजकमा वित्तिय अनुशासन नहुदाँ खर्च बढेको हुनसक्ने अनुमान सरोकारवालाहरुको रहेको छ ।

आयव्यय सार्वजनिक कार्यक्रममा नेपाल उद्योग वाणिज्य महासंघका पुर्व केन्द्रिय सदस्य चोपनारायण श्रेष्ठले संघले महोत्सव आयोजना गरेर वालिङको सामाजिक, आर्थिक, पर्यटन र कृषिको प्रचारप्रसारमा ठुलो टेवा पुगेको बताए । आगामी दिनहरुमा पनि यस्ता खालका महोत्सवले वालिङको मुहार फेरिनेमा आफु विश्वस्त रहेको बताए ।

कार्यक्रममा पुर्व अध्यक्ष ले.यामबहादुर गुरुङ, कर्णबहादुर गुरुङ, उपाध्यक्ष गिरमान गुरुङ्, कोषाध्यक्ष तारा श्रेष्ठ र महासचिव केशरबहादुर खाँण(ध्रुव) लगायतका बक्ताहरुले हरेक महोत्सवले नयाँ नयाँ सिकाउने हुँदा सिक्दै जाने र सुधार्दै जाने प्रतिवद्धता व्यक्त गरेका थिए ।

पत्रकार सम्मेलनमा अध्यक्ष पौडेलले पत्रकारहरुले उठाएको जिज्ञासालाई मेटाएका थिए । संघले सार्वजनिक गरेको आयव्ययले आगामी आठौ महोत्सवलाई चुनौती थपिदिएको पत्रकारहरुले सुझाव दिएका थिए ।