बाहिर आईजीपीद्धारा ब्यारेक उद्घाटन, भित्र थुनुवाको आत्महत्या !

१७ असार, काठमाडौँ । जिल्ला प्रहरी कार्यालय ललितपुरमा बुधबार आईजीपी ठाकुरप्रसाद ज्ञवालीले नवनिर्मित ब्यारेकसहितको जिल्ला प्रहरी कार्यालयको भवन उद्घाटन गरे ।

उद्घाटनलगत्तै प्रहरी कार्यालय ललितपुरबाटै एक थुनुवाले आत्महत्या गरेको खबर आयो । झण्डै साढे १० बजे सप्तरीका दुर्गेश यादव शौचालयमा आत्महत्या गरेको अवस्थामा भेटिएका थिए । आरोप थियो, युवतीलाई बलात्कार गरेको । लगत्तै प्रहरीले उनलाई पाटन अस्पताल पु¥यायो ।

तर १० बजेर ४६ मिनेटमा अस्पतालले उनलाई मृत घोषणा ग¥यो । घटनापछि प्रहरी आफैं अलमल्लमा परेको छ । एकातिर कोरोनाको रिर्पोट नआएकाले उनलाई छुट्टै राखिएको थियो । अर्को उनीमाथि झुटो आरोप लगाइएको हो कि ? भन्ने आशंका छ । उनको सुसाइट नोट हेर्दा उनीमाथि झुटो आरोप लगाएको देखिन्छ ।

बलात्कार कि फसाउन गरिएको प्रपञ्च !

हिरासतको शौचालयमा आत्महत्या गरिएको अवस्थामा भेटिएका दुर्गेश पेशाले स्वास्थ्यकर्मी हुन । स्वास्थ्य सहायक पदमा कार्यरत उनी कोटेश्वर बस्थे । स्वास्थ्यकर्मी भएपनि उनलाई प्रहरीले तीन दिनअघि बलात्कार आरोपमा पक्राउ ग¥यो ।

१७ बर्षीया युवतीलाई बलात्कार गर्न खोजेको आरोपमा उनलाई पक्राउ गरिएको प्रहरीले जनाएको छ । ग्वार्कोमा १४ गते राति साढे १० बजेतिर युवतीमाथि बलात्कार गर्न खोजेको प्रहरीको आरोप थियाे ।

सोही राती उनलाई प्रहरीले जबरजस्ती करणी उद्योग सम्बन्धी कसुरमा पक्राउ गरेर अनुसन्धान शुरु गरेको हो । अदालतबाट ५ दिनको म्याथ थप गरेर अनुसन्धान चलिरहँदा उनी आत्महत्या गरेको अवस्थामा शौचालयमा भेटिए । साथमा सुसाइड नोट पनि छ ।

तर सुसाइड नोटले उनलाई फसाउन खोजिएको देखाउँछ । बुधबार बिहान प्रहरी हिरासतमा शौचालयको झ्यालको रडमा तन्नाको पासो लगाएर उनले आत्महत्या गरे ।

आत्महत्या गर्नुअघि सुसाइड नोटमा ‘आइएम नट अटेम्प्ट द रेप, प्लिज सेभ मी गड’ अंग्रेजी शीर्षक दिएर उनले लेखेका छन, ‘मैले कसैलाई रेप गरेको छैन, मलाई आरोप लगाइएको छ । म त्यस्तो मान्छे पनि होइन । नराम्रो सोचेको होइन, म यस्तो आरोप सहेर बाँच्न सक्दिनँ । म माथि लगाएको आरोप सहेर बाँच्न सक्दिनँ । म यो दुनियाँबाट बिदा हुन गइरहेको छु।’

उनको यो सुसाइड नोटले गम्भिर अवस्था सिर्जना गरेको छ । सामान्यतया पेशाले स्वास्थ्यकर्मी रहेका व्यक्तिबाट बलात्कार हुनु आफैमा असामान्य हो । त्यो पनि मध्यरातमा । घरबाट पढ्नकै लागि शहर छिरेका युवा स्वास्थ्यकर्मी भएपछि नचिनेकी युवतीलाई जबर्जस्ती करणी गर्न खोजे भन्नुपनि आफैमा सामान्य कुरा होइन ।

बलात्कार गरेपछि उनले आरोप स्वीकार गर्न सक्थे । तर उनले बिनाकारण लगाइएको आरोप स्वीकार नगरेर आत्महत्याको बाटो रोजेका छन । जुन सामान्य होइन । यसर्थ अरुलाई आत्महत्या दुरुत्साहनमा पक्राउ गर्ने प्रहरी अब आफैले युवालाई आत्महत्या गर्न बाध्य पारेको जस्ताे देखिदैछ।

कसैले कसैलाई भनेर बलात्कार र आत्महत्या गर्दैन : एसपी कार्की

बुधबार आईजीपीद्धारा नयाँ भवन उद्घाटन गर्दा गर्दै यो घटना घटेपछि यसलाई गम्भिर रुपमा लिइएको प्रहरी बताउँछ । तर उनीमाथि लगाइएको आरोप सामान्य देखिदैन । त्यसमाथि सुसाइड नोटमा लेखिएको कुराले उनीमाथि प्रहरीले ज्यादती गरेको स्पष्ट छ ।

घटनालाई अनुसन्धान गर्न एसपी तुलबहादुर कार्कीको संयोजकत्वमा विशेष टीम गठन गरिएको छ । जिल्ला प्रहरी कार्यालय ललितपुरका प्रवक्ता समेत रहेका कार्की यो घटना बाहिरबाट हेर्दा आत्महत्या नैं भएको दाबी गर्छन । ‘अहिलेसम्म देखिएको सबै कुरा हेर्दा आत्महत्या हो’ उनी भन्छन, ‘तर खास कारण खुल्न बाँकी छ ।’ तर सुसाइड नोट र उनीमाथि लगाइएको आरोपबारे एसपी कार्कीको जवाफ चित्तबुझ्दो छैन ।

उनी भन्छन, ‘कसैले म मर्दैछु भनेर मर्दैन । अनि कसैले कसैलाई भनेर बलात्कार पनि गर्दैन । प्रहरीले उजुरी आएपछि पक्राउ गरेर अनुसन्धान अगाडी बढाएको हो । कोरोना महामारीको बेला परीक्षण नगरी सबैलाई सँगै राख्न मिलेन । त्यही भएर अलग्गै राखिएको हो । यसमा आशंका गर्नुपर्ने ठाउँ के छ र ?’

उजुरीपछि प्रहरीले पक्राउ नगर्दा बलात्कृत युवतीले आत्महत्या गर्ने डर रहेको उनको भनाई छ । ‘उजुरी आएपछि पक्राउ नगरौँ, युवतीले आत्महत्या गर्ने डर । आरोपितलाई पक्राउ ग¥यौ । यता युवाले आत्महत्या गरे । यो केशमा गम्भिरतापूर्वक छानबिन आवश्यक देखेर हामीले अनुसन्धान शुरु गरेका हौँ ।’

आत्महत्या गरेका युवाको पोष्टमार्टम रिर्पोट र थप अनुसन्धानपछि मात्रै वास्तविक कारण खुल्ने एसपी कार्कीको भनाई छ । तर उनको आत्महत्यामा प्रहरी जिम्मेवार हुने तर्क गलत रहेको उनी दाबी गर्छन । ‘हामीले उजुरी आएपछि अनुसन्धान गर्ने हो । उजुरी आएपछि नै पक्राउ गरेर अनुसन्धान शुरु ग¥यौ’ उनले भने, ‘तर यसरी आत्महत्या घटना नै हुन्छ भनेर हामीले थाहा पाउने कुरा भएन । त्यसमाथि कसैले म आत्महत्या गर्छु भनेर पनि गर्दैन । घटना गम्भिर छ । वास्तविकता पत्ता लागेपछि थप कुरा भनौला ।’

सप्तरी घर भएका उनी कोटेश्वर बस्थे । उनका आफन्तका अनुसार उनी घरपरिवारका एक्ला छोरा थिए । प्रहरीले घरमा खबर गरेपछि उनीहरु सप्तरीबाट काठमाडौँतिर हिडेका छन ।