कैलालीमा निषेधाज्ञालाई जेठ ६ गतेसम्म लम्ब्याउन सिफारिस

२८ बैशाख, कैलाली । कैलालीमा पनि कोरोना भाइरस जोखिमलाई न्यूनिकरण गर्न जारी निषेधाज्ञालाई एक साता लब्याइने भएको छ । सोमबार बसेको जिल्ला कोभिड संकट व्यवस्थापन केन्द्रको बैठकले दोस्रो लहरको कोरोना भाइरसको संक्रमण बढिरहेकाले थप एक साता निषेधाज्ञा लम्ब्याउने निर्णय गरिएको हो ।

जिल्ला प्रशासन कार्यालयका सूचना अधिकारी शिवराज जोशीले हाल वैशाख ३० गतेसम्म लागु हुने गरि प्रजिअबाट जारी भएको निषेधाज्ञालाई जेठ ६ गतेसम्म लम्ब्याउन सिफारिस गर्ने निर्णय कोभिड संकट व्यवस्थापन केन्द्रको बैठकले गरेको जानकारी दिएका छन् ।

बैठकले बिहीबारदेखि लागु हुने गरि यसअघि बिहान ६ देखि १० बजेसम्म सञ्चालन भइरहेका अत्यावश्यक बाहेक तरकारी, फलफूल तथा खाद्य वस्तुका पसल व्यवसाय मंगलबार, बिहीबार र शनिबार बिहान ९ बजेसम्म मात्र खोल्न पाउने निर्णय समेत गरेको छ ।

कोभिड संकट व्यवस्थापन केन्द्रको बैठकले यसअघि बिहान १० देखि दिउँसो १ बजेसम्म सञ्चालन भइरहेका बैँक तथा वित्तिय संघसंस्थालाई समेत बन्द गर्ने निर्णय गरेको छ । तर राजश्व दाखिला र सरकारी कारोवारमा भने रोक लगाइने छैन ।