के थियो पूर्व खानेपानी मन्त्री खानको अश्लिल भिडियोमा ?

२७ चैत, काठमाडौं । जनमत पार्टीका नेता एवं पूर्वमन्त्री अब्दुल खानको अश्लील भिडियो प्रकरण चर्चामा आएको छ । एक महिलासँग सम्बन्धित उक्त अश्लील भिडियोबारे खानले आफूलाई फसाउन खोजिएको भन्दै प्रहरीमा उजुरीसमेत दिएका थिए । केही समय अघि सार्वजनिक भएको भनिएको उक्त अश्लील भिडियो यति बेला नेपाल प्रहरीको साइबर व्यूरोको अनुसन्धानकै क्रममा छ । उनले मन्त्री पदबाट राजीनामा दिनुको कारण यही मानिएको छ । 

उनले मन्त्री छाडेको केही दिनपछि एक महिलासँग ह्वाटसएपमा अश्लील गतिविधि गरिरहेको भिडियो बाहिरिएको थियो । खानले भने उक्त भिडियो ६ महिना पहिलेको भएको बताउँदै प्रहरीमा उजुरी दिएका थिए । भिडियो काट-कुट पारेर बाहिर ल्याएर आफूलाई फसाउन खोजिएको भन्दै नेपाल प्रहरीको साइबर ब्यूरोमा उनले उजुरी दिएका थिए । साइबर ब्यूरोका प्रवक्ता पशुपति रायले यसबारे अनुसन्धान भइरहेको बताए । 

पूर्वमन्त्री खानले एक महिलासँग भएको अश्लील भिडियो बाहिरिने संकेत पाएपछि मन्त्रालयबारे असन्तुष्टि जनाउँदै पदबाट राजीनामा दिएको केहीको अनुमान छ । सामाजिक सञ्जालमा आएको उक्त अश्लील भिडियो अहिले रोकिएको छ । प्रहरीले पनि अनुसन्धान नसकिएको भन्दै सार्वजनिक गरेको छैन । कतिपय जनमतकै नेता कार्यकर्ताले खानको अश्लील भिडियो सार्वजनिक नगर्न प्रहरीमाथि दवाव पनि परेको छ । 

फेसबुक र उनको म्यासेन्जरमा भिडियो आएपछि खानले छानविन गर्न उजुरी दिएका थिए । भिडियोबारे खानले ति महिलासँग सामान्य कुराकानी भएको तर भिडियोलाई अर्कै ढंगले बाहिर ल्याइएको  र काटकुट पारिएको प्रहरीको उजुरीमा उल्लेख गरेका छन् । सुरुमा भारतीय युवतीले आफूलाई फेसबुकमा फ्रेन्ड रिक्वेस्ट पठाएको उनले बताएका छन् । फेसबुकमा साथी बनेर करिब २० दिन कुरा भएपछि ह्वाट्सएपमा भिडियो कल गरेर अश्लील फोटो र भिडियो देखाइएको खानको दावी छ ।

खानले बाँकेमै हुँदा आफूसँग कुरा भएको दावी गरेका छन् । यस बारेमा जिल्ला प्रहरी कार्यालय बाँकेमा उजुरी दिएको पनि उनले बताएका छन् । सुरुमा आफूसँग राम्रोसँग प्रोफेसनल नै कुरा भएको जानकारी दिँदै उनले भने, ‘तर पछि ह्वाट्सएपमा कुरा हुँदा भने सिधा त्यस्ता फोटो र भिडियो देखाउन थालेपछि साथीहरूको प्रोफाइलमा पनि हालिदिएछन् । यो मलाई जानाजानी फसाउने काम भएको छ ।’ 

यता, प्रहरीले भने भिडियोमा खानले अश्लील गतिविधि गरेको देखिएको दावी गरेको छ । सुरुमा ती युवतीको अश्लील भिडियो हेरिरहन्छन् । पछि आफैं त्यस्ता गतिविधि गरेको भिडियोमा देखिन्छ । ती युवतीसँग उनले हिन्दी भाषामा कुरा भएको प्रहरीको भनाइ छ । खानलाई प्रहरीले यसमा अनुसन्धान गरेर भिडियो पनि हटाउने आश्वासन दिएको पनि बताइएको छ । साइबर व्युरोले सो विषयमा अनुसन्धान जारी रहेको बताएको छ । 

जनमत पार्टीका उपाध्यक्ष समेत रहेका खान माघ ११ गते मन्त्री बनेका थिए । तर जनमतले उद्योग मन्त्रालय माग गरेको थियो । उक्त मन्त्रालय नपाएपछि चैत १७ गते उनले मन्त्रीबाट राजीनामा दिएका थिए । खान जनमतका समानुपातिक सांसद हुन् । सोही भिडियो बाहिर आउने भएपछि उनले राजीनामा दिएको चर्चा पनि व्यापक रहेको थियो । उनको भिडियो बाहिर आउनु पूर्व खानेपानी मन्त्रालयमा चर्चा भइसकेको एक कर्मचारीले बताए ।