राजविराजबाट कीर्ते नागरिकता बनाउने गिरोह पक्राउ


Share This


नेपालबहस संवाददाता    89 Views

२८ मंसिर, काठमाडौं । प्रहरीले सरकारी कर्मचारीको मिलोमतोमा किर्ते नागरिकता बनाउने गिरोहलाई पक्राउ गरी आज सार्वजनिक गरेको छ ।

जिल्ला प्रहरी कार्यालयद्वारा आयोजित पत्रकार सम्मेलनमा सप्तरीका प्रहरी उपरीक्षक मुकेशकुमार सिंहले राजविराजस्थित राजरंगशालामा कीर्ते नागरिकता बनाइरहेको सूचना प्राप्त भएलगत्तै सो गिरोहलाई पक्राउ गर्न सफल भएको बताए ।

कीर्ते नागरिकता बनाउने कार्यमा मुख्य संलग्नता सर्लाही ब्रह्मपुरी गाउँपालिका–७ निवासी तथा हाल जिल्ला प्रशासन कार्यालयमा करारमा सहयोगी अजयकुमार यादव र सप्तरी, महदेवा गाउँपालिका–१ निवासी तथा राजविराज नगरपालिका–१० का वडा सचिव मो वकिल मियाँ रहेको प्रहरीको भनाइ छ ।

जिल्ला प्रशासन कार्यालयका प्रशासकीय अधिकृतको नक्कली हस्ताक्षर, जिल्ला प्रशासन कार्यालयको नक्कली छाप र सक्कली नागरिकता प्रमाणपत्र र त्यसमा अंकित होलोग्रामसहित विभिन्न मितिमा जारी चार थान नागरिकता समेत उक्त गिरोहबाट बरामद गरिएको छ ।

सोही आरोपमा भारतको उत्तरदेनाजपुर, अन्तकोठा, थाना हेमन्तवाद बस्ने मो लतिफुर रहमान, भारतको किसनगंज ग्राम तिवरिया, कोचाधामन निवासी र हाल झापा बिर्तामोड–१ बस्ने मो नवेद, सुनसरीको हरिपुर गाउँपालिका–८ निवासी कलिम मियाँ र झापाको बिर्तामोड नगरपालिका–४ निवासी मो सइरोलाई पनि पक्राउ गरिएको प्रहरीले जनाएको छ । उनीहरुका साथबाट कीर्ते नागरिकता चार थान, मोबाइल छ थान, सीमकार्ड, रु दुई लाख १४ हजार, विभिन्न पदका नक्कली सरकारी छाप ११ थान बरामद भएको प्रहरीले जनाएको छ ।

तपाईको प्रतिक्रिया

सम्बन्धित समाचार