एमाले नेता बस्नेतको फेसबुकबाट शरणार्थी प्रकरणबारे अडियो सार्वजनिकः नेतृ राणा र खाँणले रकम लिएको दाबी

२४ वैशाख, काठमाडौं । नेकपा एमालेका नेता महेश बस्नेतकाे फेसबुक पेजबाट शरणार्थी प्रकरणमा रकम लिएको भन्ने अडियो सार्वजनिक भएको छ । उक्त अडियोमा नेपालीलाई नक्कली शरणार्थी बनाई अमेरिका पठाउने क्रममा नेपाली कांग्रेसका सभापति शेरबहादुर देउवाकी पत्नी अरजु राणा देउवा र नेता बालकृष्ण खाँणकी पत्नी मञ्जु खाँणले रकम लिएको दावी गरिएको छ ।

बस्नेतको फेसबुकमा सार्वजनिक गरिएको अडियोमा मञ्‍जु खाँणलाई रकम दिइएको भनिएको छ । अडियो यसै प्रकरणमा पक्राउ परेका दाङका सन्देश शर्मामार्फत आएको बताइएको छ ।  

नेता बस्नेतले आइतबार बिहान पोखरामा आफूहरुले सक्कली अडियो सार्वजनिक गरिसकेको भन्दै कांग्रेस नेतृ आरजु राणाले यस प्रकरणमा २ करोड ५० लाख र मञ्जु खाँणले ६ करोड रकम लिएको दावी गरेका थिए । बस्नेतले नक्कली भुटानी शरणार्थी प्रकरणमा मुछिएका कांग्रेसका प्रभावशाली नेताहरूमाथि कारबाही हुनुपर्ने दावी पनि गरेका छन् । 
 
उनले पूर्व गृहमन्त्री बालकृष्ण खाँणदेखि पूर्व उपराष्ट्रपतिका छोरा दीपेश पुन पूर्व प्रधानमन्त्री शेरबहादुर देउवापत्नी आरजु राणा समेतलाई छानबिनको दायरामा ल्याउनुपर्छ भन्ने मागसहित अडियो सार्वजनिक गरेको बताएका छन् । रायमाझीका विषयमा भने उनले कानुनी प्रक्रियाबाट बाहिर नजाने बताएका छन् । बस्नेतले रायमाझीले यो प्रकरणमा राज्यलाई सहजीकरण गर्ने काममा भूमिका खेल्ने बताएका छन् । 

उनले भने ‘हामीले एउटा अडियो पाएका छौ र हिजो त्यो सार्वजनिक पनि गरेका छौ । त्यसमा आरजु भाउजूलाई साढे २ करोड र पूर्व गृहमन्त्री बालकृष्ण खाँणकी श्रीमती मञ्‍जु खाँणलाई ६ करोड रूपैयाँ दिएको भनिएको छ’, बस्नेतको भनाइ छ । नेता बस्नेतले बालकृष्ण खाँण गृहमन्त्री हुँदा भुटानी शरणार्थी प्रकरणमा लेनदेन भएको अडियोबाट खुलेको दाबी गरेका छन् ।  

बस्नेतले राणा र गृहमन्त्री बालकृष्ण खाँणकी श्रीमती मञ्‍जुले नक्कली भुटानी शरणार्थी बनाएर अमेरिका लैजाने भन्दै पैसा उठाउने गिरोहसँग साढे आठ करोड लिएको दाबी सहितको अडियो सार्वजनिक भएको दावी गरेका हुन् । अडियोमा सरुवा बारे असन्तुष्ट एक व्यक्तिसँग भएको कुराकानी मात्र सुनिन्छ । अडियोमा कुरा गर्ने दुवै व्यक्तिको पहिचान पनि प्रष्ट सुनिएको छैन । 

अनावश्यक रूपमा सरुवा गरेर पैसा लिन खोजेको, दुहुनो गाई बनाएको भन्दै एक व्यक्तिले भनेका छन्, ‘ आरजु राणालाई साढे दुई करोड र मञ्‍जु खाणलाई हनुमानथानको घरमा ६ करोड बुझाएकै हो । प्रमाण छ नि मसँग भनिएको छ । यो अडियो यसै प्रकरणमा पक्राउ परेका दाङका सन्देश शर्मामार्फत आएको बताइएको छ । अडियोमा दाबी गरिए अनुसारै काठमाडौंको हनुमानथानमा खाँणको घर छ । बालकृष्ण मैजुवहालमा डेरामा समेत बस्ने गरेका छन् । अडियो टिकटकबाट सार्वजनिक भएको हो । यही अडियो नेता बस्नेतको फसबुकमा छ ।